為乜靜觀？
如果你問我打坐/冥想究竟有乜實際用途，唯一一樣野我可以好肯定咁答你，就係我依家比以前更加為意到，其實我經常唔為意自己嘅行為同思想。
市面上大部份有關mindfulness meditation（靜觀打坐/正念修行）嘅書本、apps、課堂等都承諾靜觀練習有助減壓、可以帶來平靜等等嘅好處。一開始，我亦係因為想想可以改善集中能力、想搵方法冇咁容易爆，所以開始打坐。我第一個用嘅app係Headspace。我每日打坐10分鐘，持續大概兩個月後就停咗。放棄主要嘅原因，係因為打坐得到嘅安穩、平和等良好感覺，雖然係有，但好飄忽，同埋太過微弱。
我發現，打坐會帶來嘅好處，需要長時間嘅醞釀，而且好處黎得好乍然、瞬間就會淡去、然後消失。打坐帶來嘅好處，就好似你高速地將兩隻手互相摩擦，摩到咁上吓雙掌就會發熱，但當你一停止摩擦，掌心嘅微溫就會馬上消失。如果你想保持兩隻手嘅微溫，你就必須要繼續摩擦雙掌；如果你想保持打坐帶來嘅安穩、淡定、什麼都好，你就必須要持續咁打坐。
到咗今日，經過咗差不多八年嘅打坐，同埋挨過十日嘅靜觀靜修監獄後，我開始明白，點解咁多人會願意奉獻佢哋嘅一生去靜修。冥想，其實係一個幫助你認識所謂現實嘅過程。
OK，此刻，我完全為意倒，當我用咗「現實」呢個詞，你地都已經開始反眼、準備熄機、走人。我都唔想咁扮嘢、咁認真，去嘗試討論「真理」。但小弟實在技窮，搵唔倒更貼地嘅方法去形容我嘅體會 。。。
其實靜觀打坐係練啲乜？大部分嘅打坐，一開始都係培養集中力。有啲打坐會叫你將注意力集中喺一件物件、或者一句話。靜觀打坐會叫修行者嘗試集中觀察呼吸、或身體不同嘅感受、或者聽到嘅聲音。一開始，大部分人都會好快就覺得沮喪，因為所有人都會發現，原來我地集中觀察嘅能力係離譜地差勁。唔駛10秒，我地個腦就會飄咗去唔知邊度。而且最痛苦嘅，就係無論我地幾努力，個腦就係唔聽駛，不自控咁胡思亂想。
不過個腦失控地亂咁跑，其實就係靜觀打坐嘅關鍵。如果以舉啞鈴作為比喻，當你舉起個啞鈴，肌肉收緊然後放鬆，呢個就係做咗一下訓練動作。你舉多幾下，肌肉就會得到更多嘅鍛鍊。靜觀嘅鍛鍊，就係當每次你遊魂，然後你發現自己已經遊咗魂，你就係喺度練緊你個腦嘅「肌肉」。「集中 -》遊魂 -》發現遊魂」，然後再開始：呢個就係大腦舉鐵嘅動作。所以越遊魂得多，你就越有機會去鞭策你個腦。發現自己遊魂嘅次數越多，你個腦就會越練得「大隻」（有科學理據back up）。
This is it，僅此而已：靜觀打坐 =「集中 -》遊魂 -》發現遊魂」，「集中 -》遊魂 -》發現遊魂」。
靜觀打坐時嘅精神集中，會令人慢慢感到安穩，個心會靜落黎，不過呢啲其實都係副作用。就等同於做完運動，人會覺得開心，舒暢。但呢啲良好嘅感受，過一陣間就會消失。你想再有呢啲快感，你就要再跑步、再流汗。做運動主要嘅目的，係強身健體，令你可以更好應付生活；靜觀主要嘅目的，係強腦健靈，令你可以更好應付現實。再離地啲講，靜觀，係練習你察覺亂想、打斷胡思嘅能力。
靜觀嘅另外一個訓練，係幫助我地擺脫比自己嘅情緒騎劫。譬如，你排緊隊攞錢。你前面條友嘅女朋友突然喺隔離條隊走過黎，打你尖。你㷫，本來都係人之常情。但如果你隨之開口屌佢，佢還拖，你地先口角，然後動武互片，警察殺到，噴你一臉胡椒水。通常呢一連串嘅反應，都好似浪濤咁，一浪接一浪咁黎，睇都未睇得切，就莫講反唔反應得黎。所以關鍵，就係當海嘯打緊過黎，我地有能力「停一停」- 究竟係火遮眼，定係退一步，分別可以好大。同樣嘅情況，可以係你仔女唔食菜嗰一刻，你比唔比你嘅被唔尊重而憤怒嘅情緒控制你去爆佢鑊勁嘅，亦可以係你老闆挑剔你嘅powerpoint 嗰一刻，你比唔比你被羞辱而帶來嘅恐懼控制你淆底/龜縮。
所以日久嘅靜觀練習，你會慢慢覺知，其實每時每刻，我地都有選擇嘅餘地。當我地自我察覺嘅能力改善，自然我地就會有更多機會可以選擇我地嘅反應。我地亦會越來越可以分辨倒自己所有唔同嘅感受、感覺。唔開心，可以有好多種色彩：失落、絕望、傷心、失望、悲哀等。當我地知道得清楚少少自己嘅反應係咩，自然就機會可以嘗試適當咁去應對。
靜觀亦會慢慢咁證明俾你睇，就算最得人驚嘅情緒，譬如羞辱，如果你死力睥住佢，你會發現任何情緒都會「過期」，然後逐漸減弱。當然講就易、做真係超難。但仇恨三分鐘同仇恨三日，對自己同身邊嘅人嘅影響，實在有天淵之別。
又試吓用做運動做比喻：健康嘅身體可以幫你到咗60歲嘅時候，就算你個曳孫極速衝過黎要你抱，你都唔駛太擔心自己條腰同盤骨會頂唔順；健康嘅覺知能力，可以幫你喺你老婆離世嗰一刻，你嘅苦楚可能會短暫一丁點。
現實，就係冇嘢係永恆。好嘅，壞嘅，都會「過期」。其實我地心裡面好明白呢個道理。你深愛嘅英超球隊、嗰舊無法抗拒嘅菠蘿油、同埋你新買個對Supreme x Adidas波鞋，重來都無間斷咁展示緊呢個「無常」嘅現實比我地睇。關鍵係，你理唔理解倒，接唔接受倒，有冇體驗倒，同埋有冇方法應對倒呢個事實。
而靜觀，對我黎講，係一套方法去令我感受呢個現實、體會咩嘢係「意識」(consciousness) 、點樣去掌控同微調我嘅「覺知」(awareness)能力、然後喺整個修行過程中，讓我可以同曇花一現嘅安穩、平靜同快樂，乍然相逢。
